Di HENRY BATING
TAWAU: Sundung nosiliu do suang talun di olias om osuon do mongingintalun mamadil nga montok bakas id kotolunan Yayasan Sabah Maliau, osimbayan ilo sampanau-panau miampai minsungal id natadon do walai.
Minoboros ih Abel Gintod, songulun pakaakaraja id kotolunan ponombuluian dilo do bakas sampanau-panau id natadon nopo nga somoonu popiakanon do mogigiyon ngawi id kawalaian pakakaraja.
“Suai ko bakas, ogumu nogi suang talun suai do sampanau-panau miagal do gajah,” ka di Abel.
Tumanud di Abel, tipaakan diolo do bakas nopo nga orukut-rukut kapaampai no do taakanon tulun ih nonsok id ropuhan.
SONGINAN bakas minsungal id natadon miampai au usigon do tasu.
“Somoonu nogi koumbal oku papaakan bakas do maggi nga ogorot nogi, okon nogi lumombon do okito ku,” ka di Abel.
Iso po kawagu oh koimayaan tu bakas sampanau-panau dii nopo nga au usigon om au nogi gusaan do tasu.
Kotolunan Maliau id siriba kokuasaan do Yayasan Sabah nopo nga koiyonon pinotomod montok pomogompian sandad sumusuni om nogi mogisusuai suang talun.
Nosiliu ponombuluian oh koiyonon sandad dilo montok mononoriuk, susumikul om nogi tulun ginumuan minsingilo karait do guno talun sandad montok komogoton koposion do tulun.
Id suang do talun Maliau, ogumu oh koiyonon kagayat miagal ko wasai sandad, kokoyuan tagayo om rusapan herba ngawi.
