Di HENRY BATING
BOSING nopo nga kiwaa id pogun talasu om nogi id pogun tosogit. Suai pogun, suai bosing. Kiwaa ih bosing tagayo om kiwaa nogi ih tokodo. Nga bosing ngawi ponong id pomogunan tokou nopo nga ih tongokodo.
Sundung kiwaa bosing minsusui id tana nga kogumuan bosing ponong hiti daton nopo nga bosing di minsusui id sawat do kokoyuan. Bosing ngawi dilo nopo nga nolikupan do wulu, mantad tulu gisom id tikuw.
Kiwaa piipiro kawo do bosing. Kiwaa ih bosing koubasan miampai kokitanan do osisilou. Kiwaa nogi bosing toitom roitan do sopuan. Om kiwaa nogi bosing tagayo roitan do manggas.
Bosing nopo nga tayam mamalia kiraha do alasu. Manamong oh bosing do tanganak ngawi dau. Bosing nopo diti nga mangakan-ngakan do roun om tuwa kayu. Oinsanan taakanon do bosing nopo nga id sawat do guas kayu, ingga id siriba do kayu lobi poi h poimbiliu id katanaan.
Mantad poogi dilo do ogumu nogi tulun tokou mangakan do bosing. Suai ko posulungon do sodik, tongkurung om nogi bodilon, ogumu nogi bosing dagangon id tomu. Kiwaa nogi wookon kadai poginuman poposodia nansakan do bosing sabaagi pusas.
Bosing nopo nga mogiititmung do oiyo ko bosing. Bosing gontoluhan om bosing karud poingiyon id iso rumun. Mantad id suang do rumun dii, maganak om sumakag oh kobosingan. Bosing nopo ngawi di tongokoro po nga poinsuang id rumun miampai do otimung minsingilo minsusui raan om sumimbul kumaa id raan do suai.
Rumun do bosing nopo nga winonsoi mantad do raan tongokodo do kayu miampai roun-roun ngawi. Rumun do bosing nopo nga ponong id sawat poinsiat do pipangaan raan do kayu.
Koiyonon do rumun bosing id sawat om id dolikupan nopo nga montok monginsodu kaantakan taraat tolonon do wulanut toi ko tutukan do tombolog tangagayo. Monguni oh bosing miampai tuni di oiyang montok milohou-lohou miampai kobosingan ngawi suai.
Milohou-lohou oh bosing montok mogihum taakanon om nogi montok popoilo lumosok soira kopuriman do kiwaa koligaganan.
Komilaan tagayo do bosing nopo nga kaanu sumusui karaanan miampai do osiau kopio mantad id iso guas kumaa id guas do suai. Kaanu nogi oh bosing sumimbul miampai tumulud montok sumamping id kokoyuan suai montok rumikot id koiyonon di kiwaa taakanon.
Komilaan do bosing sumimbul nopo nga mantad no do osulimbang oh hakod om tikuw dau. Sondulu do bosing nga atarom ih mogowit dau kaanu kumorom id raan om korounan do kayu.
Bosing nga kinipon nogi do osisid om atarom. Mantad tinarom nipon do bosing, kaanu oh bosing momosu kulit kouwaan miampai do osikap miagal ko piasau. Kaanu nogi oh bosing mongingkid do kayu montok mongimbulai taakanon.
