Di HENRY BATING
TAMBUNAN: Toririmo di Kumoduwo Boyoon Montiri Datuk Seri Dr Jeffrey Kitingan manakadai komogoton pogigiyon momutanom kaampai no koumoligan kawalaian poompus disan do bawang.
Montok mamagampot do hontolon dilo, sabaagi Montiri Pomutanaman om Ponginsadaan Sabah, nongoi di Dr Jeffrey kakapo kapamansaian do kinolian pomoluyung karanahan poompus bawang Pegalan id Kg Lalapakon.
“Sonongon oh kinolian id karanahan dilo montok komogoton do momutanom ngawi,” ka dau tu isio po nogi kawagu oh Porosidin do Parti STAR Sabah.
Poingampai nogi id kinotombuluian dilo ih Potunud Koupisan Kinolian Sabah (JPS) Waily Harim, Upisor Watas Tambunan Jumain Abdul Ghani, Injinior JKR Tambunan Ir Dr Michael Tay om ih PPM Tambunan Alexius Kiob.
Kinolian nokomoi ih kapaampai pongusin RM8.8 riyong nopo nga pikiikiro do opongo do ontok September 2022.
Soira do opongo, kaanu oh kinolian dilo manaak komogoton kumaa karanahan ngawi id Nambayan om Kiawayan.
Di kopongo ilo, luminombus ih Dr Jeffrey minongoi kakap id Kg Kapayan Lama om Kg Gasabon Keningau tu isio po nogi kawagu oh Puru Parlimen Keningau.
Minongoi ih Dr Jeffrey id koiyonon dilo montok mintong talun-alun noputut id disan bawang Pegalan.
Kiwaro nogi kawalaian id koiyonon dilo do oligogon apayang tu poindoros nodi kopio disan bawang Pegalan.
Montok monolibamban do kobolingkangan dilo, nakapanau di Dr Jeffrey oh pibarasan miampai do upisor koupisan kaampai om nogi mogigiyon montok minongintutun do laang toguangon.
Tumanud di Dr Jeffrey, laang nopibarasan nopo nga kapaampai kasagaan mantad porinta pogun Sabah om kopokianu nogi do kopoobian kousinan di agayo.
