Di HENRY BATING
KOTA KINABALU: Au kotoguang do kobolingkangan wagas oh pogun Sabah sundung baino diti kiwaa kaantakan toruol rumoliu Covid-19.
Minoboros ih Kumoduwo Boyoon Montiri Datuk Seri Dr Jeffrey Kitingan do wagas nopo nga koburu-buruon di au omilo pologoson do au kabagal montok toinsanan tulun id pogun diti.
“Kopomutanaman do parai nopo nga iso kotorinaan di oponsol kopio montok mongintopot do toririmo kabagal oh wagas montok toinsanan tulun momoli,” ka dau.
Noboros di Dr Jeffrey ilo tu isio po nogi kawagu oh Montiri Pomutanaman om Ponginsadaan Sabah di ontok minamung do kotombuluian di Datuk Seri Dr Ronald Kiandee kumakap do longkod ponimungan wagas pogun id Telipok di Tadau Kolimo.
Ih Ronald nopo nga Montiri Pomutanaman om Pomorunan Taakanon (MAFI) Malaysia.
Kinotombuluian dilo nopo nga mitunud do pinibatosan konsesi id pialatan do porinta pogun Malaysia om nogi Komponi Padiberas Nasional Berhad (BERNAS).
Tumanud suang pinibatosan dilo, nasagaan do toguangon kopio BERNAS do toririmo kabagal oh wagas montok toinsanan tulun id pogun diti poompus timpu.
