‘Kaamatan Monunduan do Winorun’ tema Kaamatan Pogun Sabah 2022

DR JEFFREY G KITINGAN

Di HENRY BATING

KOTA KINABALU: Nasagaan no do Momuu’an Mangazu Kaamatan Pogun Sabah 2022 do tema Kaamatan toun baino nopo nga ‘Kaamatan Monunduan do Winorun’ toi ko id boos do tangaa, ‘Kaamatan Monunduvan do Vinoun’.

Iho nopo nga pinointahang di Kumoduvo Vozoon Montili Sabah Datuk Seri Dr Jeffrey G Kitingan sabaagi Poniikoon Mangazu Kaamatan Pogun Sabah 2022 di kahapas oh miting koiso momuu’an diho di minggu nakatahib.

Nasagaan nogi oh tema diho doid nuhudan tohu boos kapaampai do Malazu om nogi English,” ka dau tu isido po nogi vagu oh Kumoduvo Polosidin do Koisaan Koubasanan Kadazan Dusun (KDCA).

Tema diho id boos do English nopo nga ‘Kaamatan Ensouls Nature’ om id boos Malazu nopo nga ‘Kaamatan Menjiwai Alam Semulajadi’.

Di kahapas minoniikoon do miting diho, pinopointahang nogi Dr Jeffrey do kopotimpuunan Kaamatan Nazatan Pogun Sabah do ontok 1 Mei nopo nga kaanjul doiho id uvang Keningau.

Kinootuson do miting mamadadi do Keningau sabaagi do izonon potimpuun Kaamatan pogun Sabah tinoimo miampai kounsikaan di Upisol Uvang Keningau, Walter Kenson.

Koubasanan Kedayan kopobuu nogi do ponombuhuzan.

Tumanud di Dr Jeffrey tu isido po nogi vagu oh Montili Pomutanaman om Ponginsadaan do Kaamatan nopo nga iso lahan do tinau Kadazan Dusun Murut popotungkus do koubasanan kumaa sinakagon kavavagu ngavi.

Suvai mantad dii, Kaamatan nga izanan nogi montok popointutun do ponombuhuzan kagazat doiti pogun Sabah maza do abaabazan kapaampai pokitanan koubasanan om kinoizonon ngavi togingo,” ka dau tu isido po nogi vagu oh Puu Parlimen Keningau.

Agazo kahansanan di Dr Jeffrey do kapanaak oh panaandakan Kaamatan do komogoton toihaan, kopiumanan poingkavas ningkokoton koposizon om nogi popobuu pongindopuan di kapaampai koubasanan om dagang tinoodo mantad koubasanan.

scroll to top