Oleh HENRY BATING
LONDON: Nakaanjul tavaavasi o Borneo Forum Ko-6 di Tadau Koonom nakatahib binuu’an di Polosidin do Kotinanan Borneo Sompomogunan noomungan do minampazat ngavi mantad mogisuusuvai pogun.
ALLAN
Pinopointahang ih Polosidin do Borneo Forum Ken Dunstan Kundaya do tuduvan pinogibaabasan diho nopo nga mongintong kosivatan oivang sumusuut kopoundohian hongkod pogun Indonesia mantad Jakarta kumaa doid Kalimantan.
“Kalimantan Timur (id somok do Samarinda om Balik Papan) nopo nga iso pulou dotokou doid Sabah om oikot maza pamanaan talun-alun,” ka di Ken. songuhun mongingindapu nokobuu poinhongkod doiho London.
Inamung nogi doid pinogibaabaasan diho ih Petrus Boyd Pensin, songuhun mamalan kopongukaban kakadazan tagazo ih nakaampai kalaja pamalanan doid Sri Iskandar Johor om nogi pomogunan ngavi do suvai.
BOYD
Tumanud dau, koinsomok o Sabah do hongkod pogun Indonesia maza doid Tawau om osomok dii mikot monoina pongindopuan om monoguvang do mogisusuvai kosivatan kobuu’on dagang do suvai.
Naamot diho, pinopointahang nogi do pomuandaman dau ih puu BIMP-EAGA Eve Charlie kokomoi do kosivatan mongukab dagang nansakan koubasanan doid hongkod kavavagu do Indonesia diho.
“Ouhan kozo monoina dagang nansakan koubasanan tu oinsanan gunoon magansak kivaa doid Sabah om kiva nogi doiho id Kalimantan,” ka dosido ih poinhongkod mongindapu doiho id Kuala Lumpur.
EVE
Montok di Timbang Polosidin do Borneo Forum Allan Guim Dumbong, agazo kahansanan dau do oivang o poinggumu kosivatan dagang id koizonon kavavagu diho sundung do kivaa piipio ahal di kapangantob.
“Vookon kapangantob nopo nga kaampai no haang tumahib do pivohitan pogun id piahatan do Malaysia om Indonesia,” ka dau ih poinhongkod monoina kalaja doiho id New Zealand.
Poingkuo po nga kakal oivang o ogumu kosivatan dagang kumaa tuhun tokou kaampai no ponombuhuzan om nogi kotoinaan moginodop.
RICHARD
Iho nopo nga nokointahang di Richard, songuhun mongingindapu id kaganaan nokomoi.
Pibaasan nopo diho nga kapanau potitikid vuhan ih maganu do iso ahal pibaasan tagazo montok manaak lahan kumaa tuhun tokou popobuu koposizon.
