KBP tumingan mananom 2,200 guas kayu kapaampai sukod wagu, tadika

Dr Jeffrey pinopotimpuun abaabayan mananom guas kayu.

KOTA KINABALU: Tumingan oh Kelab Belia Prihatin (KBP) mananom do 2,200 guas kayu id pototongkop Malaysia ih kapaampai do 5,500 komulakan om 11,000 tangaanak kiumur 4-6 toun.

Abaabayan pinotimpuun di Kumoduwo Boyoon Montiri Datuk Dr Jeffrey G Kitingan nopo dilo nga toguangon maya do abaabayan ‘We Be-Leaf Togethet’ (WBT) ih kopohisop 55,000kg karbon do tikid toun.

Maya do abaabayan diti, karamit oh sukod wagu ngawi do toilaan om kopurimanan montok momogompi do koiyonon posorili om nogi talun sandad,” ka di Dr Jeffrey tu isio po nogi wagu oh Montiri Pomutanaman om Ponginsadaan Sabah.

Tumanud di Rijal Mustafa om ih Luqman Hakim sabaagi monoina secretariat KBP do kinopotimpuunan id Putatan nopo dilo nga noomungan do 200 tangaanak minananom do 156 guas kouwaan.

Abaabayan dilo nga nakapaampai nogi do tinimungan tabaal binuruan di Dr Yasmin Ooi mantad Fakulti Taakanon Universiti Malaysia Sabah (UMS) om tangaanak sikul ngawi do Tadika Taman Jumbo.

Kinohompitan do tangaanak tadika mananom do guas kouwaan dilo nga iso nogi oh pongitanan kumaa tulun sompomogunan lobi po do sukod wagu ngawi montok kosuhulon manamong do koiyonon posorili.

Montok kinohompitan tangaanak mananom guas tanom dilo, noboros di Dr Jeffrey do laang dilo nga kopoinsiriba nogi do kaantakan okudi taakanon om kobolingkangan taakanon okudi vitamin montok tangaanak om tulun kinoiyonon ngawi.

Id koobian do porinta pogun Sabah, pinopotunui ih Dr Jeffrey do toluod kousinan RM10,000 montok mananom do guas kayu ngawi ih toguangon do KBP.

Abaabayan kinopotimpuunan dilo nopo nga nakapanau hilo id Tabika Perpaduan Jumbo B Kg Muhibbah, Putatan.

scroll to top