Di HENRY BATING
KENINGAU: Kinoibakan di bagas Luguan Tulun Mamasok (KAN) Keningau Tongotiagak Rupert @ Alexander Kandau, 74, nosiliu do iso kinatagakon tabaal kaadaton.
Minoboros ih bagas Luguan Watas Keningau OKK Mohd Amir Datuk Ariff do ih Alexander nopo nga songulun tabaal om kitoilaan kopio id kaadaton tulun mamasok.
“Pogulu ih minamung do pulitik, ih tongotiagak nopo nga songulun susumangod kipangkat sarjan miampai nokoumbal monokisangod do kuminis hilo id Malaya,” ka do kopoilaan nuludan koposion disio.
Nokointalang nogi do pogulu minigit karaja KAN, ih tongotiagak nopo nga nokoumbal nogi do migit karaja sabaagai do Upisor Kotundaan Mogigiyon (CDO) watas Sook.
Nokotindapou minongoi kakap kapantangan tohuri nopo nga ih Panakadai Montiri Karaja Tagayo Datuk Robert Tawik om ih Lectus Fung sabaagi do upisor piromutan Parlimen Keningau id koobian di Kumoduwo Boyoon Montiri Datuk Seri Dr Jeffrey Kitingan.
