Di HENRY BATING
TAMBUNAN: Norulan oh kobolingkangan pikiikiro do 60 momutanom parai id karanahan sarayo do Sunsuron kapaampai 120 ikar soira nakaramit do toluod kalbot om turu gobion.
Nokointalang di Ponirikohon JPKK Kg Sunsuron Sokid Juhilie Ebit do naramit oh toluod dilo mantad di Kumoduwo Boyoon Montiri Datuk Seri Dr Jeffrey Kitingan sabaagi Puru Lansanon Koundangan Pogun (ADUN) Tambunan.
“Kinolian id karanahan dilo nopo nga naraag nalampai liyud tagayo di kawawagu,” ka dau.
Tumanud di Juhilie, sinondikot diolo papanau oh kapamansaian kinaraagan do kinolian dilo soira naramit oh toluod mantad di Dr Jeffrey tu isio po nogi kawagu oh Montiri Pomutanaman om Ponginsadaan.
Ontok kinopotunuian do toluod nokomoi, noboros di Kumoduwo Ponirikohon Kinolian Sabina Ingot do agayo kopio kounsikaan diolo do noinsanangan oh kinolian montok koluyungon waig kumaa karanahan.
Toluod dilo nopo nga pinaatod di Monunurat Piromutan di Kumoduwo Boyoon Montiri ih Justin Yonsoding tu isio po nogi kawagu oh Monunurat Boogian do Parti STAR Tambunan.
Toluod dilo nopo nga rinamit di Juhilie.
Poingampai nogi potindapou do ontok dilo ih Welly Arimput sabaagi do upisor di Dr Jeffrey, Cliford Iking om piipiro momuranau.
