Di HENRY BATING
TAMBUNAN: Pinopotunui oh Parti STAR Tambunan do toluod balatak taakanon kuminaa do Koisaan Tinimungan Monokodung Gatas Tina (AKSSI) montok manakadai koisaan dilo papanau do ababayan.
Toluod pinapanau do Biro Kotundunan STAR Tambunan dilo nopo nga pinotunui di Justin Yonsoding sabaagi do Upisor Piromutan di Kumoduwo Boyoon Montiri Datuk Ser Dr Jeffrey Kitingan.
Ih Dr Jeffrey nopo nga Porosidin do Parti STAR, Puru Lansanon Koundangan Pogun (ADUN) Tambunan om Montiri Pomutanaman om Ponginsadaan.
“Agayo kalansanan do kaanu daa toluod diti monokodung kumaa puru ngawi koisaan,” ka dau.
Toluod nopo dilo nga rinamit di Ponirikohon AKSSI Zandi Flora Tajin hilo id Kolinik Kolidasan Tambunan.
Poingampai nogi minooi tindapou ih Luguan Biro Kotundunan STAR Tambunan Dr James Liew miampai pinopotunui do toluod kuminaa di Dr Christine Loo montok potikidon kumaa puru ngawi koisaan nokomoi.
Piipiro momuruan do Parti STAR Boogian Tambunan nga nokorikot nogi minooi intong do kinopotunuian dilo kapaampai di Timbang Luguan Boogian Pg Saudin Pg Ahmad, Johnny Malibin (Kopoilaan) om ih Ponirikohon do Koisaan Sunduan Sabah Jean Ivy Dennis.
Piipiro Unduk Ngadau Tambunan nga nokotindapou nogi miagal di Tati Merylady P. Dominic (2012), Tati Flores Cuthbert (2017), Unduk Ngadau Balung 2021 Tati Rozeline John, minonongkibai do Unduk Ngadau Tambunan 2021 Tati Frescillavian Sobitun om Tati Wilvianney Willie.
Poingampai nogi oh tinimungan surupu do upis ADUN Tambunan ih minonoguang do koposodiaan koponoluadan dilo miagal di Jacob Anap, Liza Utoh, Fung Kin Hau om Mitchum Angelo.
