Kopoopuan Turki om kousinan Putrajaya kopoingkavas dagang Sabah, ka di Hajiji

HAJIJI popotuduk di Tengku Zafrul do iso pomounan.

KOTA KINABALU: Agazo kahansanan do koingkavas oh dagang pogun Sabah maza koikatan kopoopuan pongindopuan mantad habus pogun om nogi sokodung kousinan mantad Putrajaya.

Minoboos ih Vozoon Montili Datuk Seri Hajiji Haji Noor do pisosoomo do kotimpuun oh pidondian kopoopuan dagang id Sabah miampai do hongkod pongindopuan tagazo ngavi mantad Turki do vuhan diti.

“Monoimo tokou koozou do koikatan papaapu ngavi mantad Turki ih mikot doid Kuala Lumpur om tumihombus kumaa doid Kota Kinabalu,” ka disido.

Iho nopo nga pinointahang di Hajiji di kahapas minonoimo kinotombuhuzan kapantangan di H.E. Dr Merve Safa Kavakci, Duta Republik Turki doid upis dau doiho id Menara Kinabalu di kavavagu.

Tumanud di Hajiji, potounda nogi oh pogun Sabah montok miapu id kaganaan ponombuhuzan miampai mongingindapu ngavi mantad Turki ih kapaampai nogi do kaganaan balajalan.

“Mantad diho do minggisom tokou poposodia kounalan ngavi mongoi do avaavasi nodi oh mongingindapu ngavi mantad Turki do papanau kopoopuan dioho doiti Sabah,” ka di Hajiji.

Naamot diho, di ontok minonoimo kinotombuhuzan kapantangan di Montili Kousinan Malaysia Tengku Zafrul Tengku Abdul Aziz, noboos di Hajiji do kopoingkavasan dagang pogun Sabah aangazan monunda.

“Taangazan tavasi montok popoingkavas do ikonomi pogun Sabah kotoimo sokodung do kousinan mantad polinta Pisompuuvan,” ka di Hajiji.

Noboos di Hajiji do iho no vookon nopibaasan dioho miampai di Tengku Zafrul di ontok nakapanau oh pinisaamaan dioho doiti.

scroll to top