Di HENRY BATING
KOTA KINABALU: Notuhan norulus lumuyung oh tana mantad siba tangki waig Kg Kopungit id Blok D gisom minogowit karaagan nopuhut om nolimbunan oh stor Koupisan Kolidasan id sondot do kampung dilo.
TANA norulus notuhan 20 meter linaab.
Minoboros ih Luguan Mogigiyon Blok D Thomas Gadid do noongoi no koupisan Bomba intangai oh kinaantakan dilo om soginumu do 15 walai nointutunan do kotoguang koligaganan.
“Oinsanan mogigiyon do 15 walai dii pinokianu lumabus po daamot mantad walai diolo gisom po do aangaian kopio kokuasaan monolibamban oh koligaganan,” ka dau.
STOR Koupisan Kolidasan nopuhut.
Kopoilaan mantad mogigiyon pinopointalang do kiwaa duwo walai nohompitan tana norulus kilinaab 20 meter dii nga kakal ih ma do poimpasod oh walai dilo.
BOMBA popolondog do tanda montok 15 walai koligogon.
Poingkuro po nga piipiro poiyanan korita do mogigiyon nokotonggoi nolimbunan nalampai tana luminuyung.
Suai ko Bomba om Pulis, nokoongoi nogi kakap id koiyonon dilo upisor Dewan Bandaraya Kota Kinabalu (DBKK), upis Lansanon Koundangan Pogun (ADUN) Luyang, Koupisan Kolidasan, JKR om Koupisan Kotundunan.
UPISOR mantad DBKK minooi kakap do kinaantakan.
Montok mogigiyon di inggaa undolihon naamot, nokosodia kokuasaan oh tiyonon naamot hilo Dewan Kopungit om nogi poginadapan id Panambayangan Sacred Heart.
Naamot dilo, kopoilaan abar mantad di Montiri Kolidasan Datuk Khairy Jamaluddin pinopointalang do nokoongoi no ih lansanon dau Datuk Rosnah Abdul Rashid Shirlin kakap do kinoiyonon notuhan.
ROSNAH minooi intong id koobian di Khairy.
“Minongoi ih lansanon ku intong do tana notuhan id Kompleks C, Walai Pongubatan Queen Elizabeth I (QEH1) montok minintong do kinaraagan,” ka dau.
Poompus kinaantakan dilo di kosodop, inggaa tulun nokorundun do pinoruput.
