MID, UMS Misokodung Momonsoi Ponolidikan Kopotundaan Kousahawanan

KOTA KINABALU: Koporintaan Kopotundaan Pomorunan (MID) misokodung miampai do Univositi Malaysia Sabah (UMS) montok momonsoi ponolidika kopotundaan kousahawanan id pogun Sabah.

Montiri dilo’, Datuk Dr. Joachim Gunsalam minoboros, pinonolidikan diti timpuunan do tulan Koiso’ 2022 om maganu ilo’ do timpu solinaid 8 tulan montok momongo.

Ka disio, asil ponolidikan diti, iso’ Palan Tindakan Transformasi Kopotundaan Kousahawanan Sabah 2023 – 2028 maan wonsoiyo’ sabaagi rikoton toi puralan kopoindalanan ababayan kopotundaan kousahawanan kumaa oinsanan kotinanan di poinggompit.

“Palan diti papaatag nogi’ do pomorunan om asil nimbulayan (produk) di kosudong id tikid watas id pogun Sabah miampai mintong intodonon sandad di poinsodia’.

“Mantad haro no o palan diti, tikid watas pasanganu kointutunan pomorunan toi produk i kopokito do watas dilo’,” ka disio ontok minonimbar ponguhotan mantad Puru Lintuhun Koundangan Pogun (ADUN) Tempasuk, Mohd. Arshad Bistari id Pitimbungakan Lintuhun Koundangan Pogun (DUN) Sabah do hiti di baino’.

I Mohd. Arshad minuhot om poingkuro o bohogian komontirian do koponguhup id sunduk kogogonopan om kousinan sabaagi pongunsuban kumaa tongo’ mongingindapu’ kokomoi Ababayan Kousahawanan Iso’ Produk Iso’ Kampung i poindalanon id watas DUN Tempasuk.

Dr. Joachim po nogi’ Kumoduo Boyoon Montiri minoboros, Ababayan Iso’ Watas Iso’ Pomorunan (SDSI) tinimpuunan pinopointutun doid Malaysia di toun 1992 sabaagi Iso’ Kampung Iso’ Produk (SKSP) miampai maganu nawawayaan Ababayan One Village One Product (OVOP) mantad Jipun i nokotimpuun pointonod toun 1979.

Di toun 2002, ka disio, ababayan diti pinoinggayo suminili’ Iso’ Kampung Iso’ Pomorunan (SKSI) om talib dino nonuan ngaran wagu kuminaa SDSI di toun 2003.

“Ababayan SDSI nopo nga’ iso’ ababayan kopotundaan ikonomi i koponguhup kumaa koingkawason nindopuan di poompus om potilombus dino kapanahak waya’ kumaa kasasanangan rayat do poinpuli nogi’ mogigiyon koiyonon o kosuul no.

“Tuduan kopotundaan ababayan SDSI nopo nga’ montok poposindak produk nokoiyonon sabaagi pomorunan di kiginaras koburu’ kopiongoi di kopotundaan kousahawanan i kiginaras monokitopong,” ka disio.

Pinointalang disio, koposuulan do ababayan diti moningkanan do tolu sunduk ilo’ nopo nga’ mongimbulai mogigiyon mongungusaha’ di ‘kreatif’ om ‘ki’inovasi’ maya’ do ababayan sosio-ikonomi miampai mogigiyon; mongimbulai pomorunan kitopong pomorunan Okoro’ om Gonsuhatan (IKS) i poburuon miampai komersil mimpau poombitanan pongindopuan di kiginaras asangal om kiginaras koburu’ nogi’ kiharo romut gatang ikonomi; om mongimbulai produk ‘unik’ i aanu pointutunan do sosonginan watas toi kosuulon nokoiyonon i kapanahak kointutunan kumaa watas nokomoi.

Montok popisuai di Produk SDSI om produk pomorunan suai, kosudongan ponontuan produk SDSI pinointutunan, ka disio, i minoboros, iri no produk i koponumboyo’ sokukuri’ do duo kriteria i maan okunai sabaagi produk SDSI, ilo’ nopo nga’ ababayan i kapaampai do mogigiyon nokoiyonon; produk di ‘unik’; pomogunaan intodonon nokoiyonon; pongimbulayan romut gatang ikonomi; om kosiwatan pakarajaan.

“Kopotundaan projik ngaawi SDSI pibohogion tumanud kluster toi kaganaan ninggisaman tumanud di ginumu’ mongungusaha’, kasagaanpidagangan produk om intodonon tahata’.

“Miampai poinpuli, kopotundaan produk SDSI pinibahagi kumaa 4 kluster ilo’ noponga’ kluster produk takanon om tinumon; kluster homestay; kluster produk kraf; om kluster produk kolidasan,” ka di Dr. Joachim po nogi’ ADUN Kundasang.

Id nayatan koporintaan pogun, ka disio, MID maya’ Koupisan Kopotundaan Pomorunan om Ponolidikan (DIDR) pinopointutun ababayan “1 District 1 Small Industry” (OD1SI).

Pinointalang disio, konsep ababayan diti nopo nga’ miagal di ababayan SDSI ilo’ nopo nga’ mongintutun di tongo’ mongungusaha’ i momonsoi produk momoguno kosusukupan nokoiyonon nogi’ kiharo kosiwatan montok ruhangan gatang om potilombus dino pointangaon kumaa nayatan global.

“Maan poiradan montok watas Matunggong, bohogian DIDR minomili’ Pomorunan Gong om Manik sabaagi A babayan OD1SI sabab Pomorunan Gong om Manik nopo nga’ kointutunan osuul montok watas diti. Suai ko ilo’, kopongimbulai ilo’ do lobi kogumu’ mongungusaha’ om manahak kosiwatan pakarajaan kumaa mogigiyon pososorili’ dilo’.

“Montok nombo-nombo watas i pasanganu kosudongan di pinatatap id ababayan OD1SI, bohogian koporintaan pogun toririmo minggisom monguhup puru mogigiyon di poinggompit.

“Wookon ponguhupan di patahakon nopo nga’ miagal do ponguhupan misin toi kakamot montok papasanang puru mogigiyon momonsoi produk di osonong om gatang di poinpatut; manahak kurusus toi pingludaan kumaa puru mogigiyon nokoiyonon mooi do lobi kogumu’ i kikorohian tumanud ababayan diti om potilombus dino manahak kosiwatan pakarajaan; kapamansaian bingkil montok puru mogigiyon nokoiyonon momonsoi om papadagang produk diolo’ kumaa momomoli; om produk ngaawi’ di owonsoi maya’ Ababayan OD1SI owiton tumanud tongo’ ekspo id suang om labus pogun nogi’ padagangon id Longkod Produk IKS id poliliput Sabah,” ka disio.-Warta Oriental.

scroll to top