Di HENRY BATING
TENOM: Kiginumu do 10 mogigiyon id Kg Pamilaan nakaramit do toluod balatak taakanon tikid tadau ih pinobuyu do tinimungan mongingia id kampung dilo.
Minoboros ih Spencer Linus sabaagi momuruan do ababayan nokomoi do toluod dilo nopo nga sakadai kumaa mogigiyon di kotoguang kobolingkangan mogihum koburu-buruon poompus timpu pandemik Covid-19 diti.
“Agayo kalansanan dagai do kaanu oh sakadai diti manaak ponguhupan kumaa paganakan ngawi di kohompit,” ka dau om isio nopo dilo nga mongingia id SMK Entabuan Tenom.
Poingampai nogi pointanud pinopotikid do balatak koburu-buruon tikid tadau dilo ih Adrian Francis oh Stephen Malujin.
Tumanud kopoilaan, pikiikiro 20 mongingia mantad Kg Pamilaan poinsompuru id tinimungan nokomoi minonimung kousinan montok ponguhupan om oinsanan dilo baino diti nopo nga masagan mongia ih sikul ngawi pototongkop pogun Sabah.
Mantad kagaanan ginawo, nakaanu oh tinimungan nokomoi minonimung do lobi soribu ringgit montok pinotunui kuminaa mogigiyon ngawi di kotoguang kosusaan mogihum kopooposion poompus timpu diti.
