MOTAC Pinokianu Monguhup Pomorunan Ponombuluyan Sabah I Noumpadan Do Covid-19

MINIBOBOROS ... Hajiji (wanan) miniboboros miampai di Dr. Santhara.

KOTA KINABALU: Boyoon Montiri, Datuk Seri Hajiji Haji Noor mimang do Komontirian Ponombuluyan, Seni om Koubasanan (MOTAC) nogi’ kotinanan dau id Sabah monguhup pomorunan ponombuluyan id pogun diti i noumpadanan gagama’ do pandemik Covid-19.

Ka disio, tongo’ popoburu’ pomorunan ponombuluyan id Sabah nokopuriman kopio waya’ araat mantad Covid-19.

“Suai ko’ Komontirian Ponombuluyan, Koubasanan om Sandad Posorili’ Sabah (KePKAS), mimang tokou nogi’ do MOTAC monguhup papasarok om mononduli’ kawagu pomorunan ponombuluyan pogun diti.

“Iti kaampai no mongungusaha’ ponombuluyan mimpau do mogigiyon i momoguno sokodung montok monguhup mononduli’ ababayan soira’ noumpadanan kopio gama-gama’ do pandemik Covid-19.

“Koporintaan Pogun Gabungan Rakyat Sabah (GRS) mimang do papatantu’ siktor ponombuluyan koguli’ asarok om kosili iso’ mononoluod tosuul kumaa nindopuan pogun,” ka di Hajiji pinoposotol.

Minoboros isio dilo’ ontok minamaramit kinotombuluyan tapantang di Kumoduo Montiri MOTAC, Datuk Seri Dr. Santhara Kumar A/L Ramanaidu id kinoiyonon disio doid Sri Gaya do hiti di tadau baino’.

Nonuan i Hajiji kopointalangan kokomoi tonggungan om surupukaraja’ koupisan nogi’ kotinanan MOTAC id Sabah di Dr. Santhara om luguan ngaawi’ koupisan nogi’ kotinanan komontirian dilo’ di nokorikot.

Nokotindapou nogi’ i Monunurat Pulitik Boyoon Montiri, Datuk Dr. Roland Chia om tongo’ luguan koupisan om kotinanan MOTAC id Sabah.-Sumber Warta Oriental.

scroll to top