Munggui notutudan hamin doid Kg Landong Ayang nokotoimo sakadai

Flovia (vanan) monongkiboos miampai songuhun tanak.

Di HENRY BATING

KUDAT: Nokotoimo do sakadai mantad Komontilian Kotundaan Mogiigizon om Komogoton Layat oh munggui ngavi notutudan hamin doid Kg Landong Ayang doiti di ontok poingizon doid poizanan naamot.

Sakadai nopo diho nga pinotunui di duvo panakadai montili doid komontilian nokomoi, ih Flovia Ng om Datuk Julita Majungki di ontok minongoi izioho kakap do munggui ngavi diho doid Hamin Titimungon Tun Mustapha doiti di piipio tadau nakatahib.

Sakadai do pinotunui nopo nga kaampai no koumatan dopuan om kousinan montok paganakan ngavi nakaampai,” ka di Flovia tu isido po nogi kavagu oh Puu Hansanon Koundangan Pogun (ADUN) Tulid.

Kiginumu do 176 paganakan pinoundahiu doid poizanan naamot Titimungon Tun Mustapha gisom do otonduhi oh pogiigizon ngavi do paganakan nokomoi doid kinoizonon notutudan.

Minooi nogi ampai pinopotunui do tohuod dau ih Panakadai Montili do Sains om Tiknologi Datuk Rudy Awah tu isido po nogi vagu oh ADUN Pitas.

Tikid paganakan nokotoimo do tohuod kousinan RM1000 miampai kagaaganapan magansak akanon tikid tadau.

Julita popotunui do sakadai kumaa munggui notutudan hamin.

Nokointahang di Julita tu isido po nogi vagu oh ADUN Matunggong ih poingamung po nogi vagu doid kotoinaan upis uvang Kudat do potitikid munggui tapui diho nga kotoimo nogi sakadai RM2000 montok mongumbasi do hamin notutudan.

Doid kinotombuhuzan di Rudy diho, pinopotunui nogi isido sakadai kakamot miaga do kipas montok kagaaganapan do paganakan ngavi pointindooi doiho kaampai no pakaakalaja ngavi manamong di paganakan ngavi nokomoi.

scroll to top