Di HENRY BATING
KOTA KINABALU: Minggisom oh porinta mogihum do ralan poingkawas asil gata id Sabah miampai popomogot do gatang kopomolian mantad momukabun ngawi.
Pinopointalang ih Ponirikohon do Kotinanan Pomorunan Gata Sabah (LIGS) Edward Linggu do tumilombus nogi oh porinta minggisom sundung do kotoguang oh pomogunan baino do kobolingkangan korolihan COVID-19.
“Pomorunan gata nosiliu do iso dagang tagayo pogun Sabah kumaa labus pogun,” ka dau.
Ilo nopo nga pinolombus di Edward kuminaa pinibarasan koupisan ontok minongoi tombului do kopolobusan gata id Papar om kilang gata id Beaufort di ontok Tadau Kaapat, 22 Julai 2021.
Poingampai nogi id tinimungan minoi kakap karaja dino ih Puru Potunud Kotinanan LIGS, Kapitan Stephen Teo tu isio po nogi kawagu oh Luguan Boogian STAR Karambunai.
Kinotombuluian id kilang gata Beaufort nopo nga pinopointalang do ogumu no kinoburuon kakamot kapamansaian gata montok dagangon kumaa id labus pogun nung piagalon no di pogulu.
