Di HENRY BATING
PUGAI BALABAK! Iho no tuhu do tinimungan susuzan toniba (suniba) sinuatan do 20 Monunuat Momogun Malaysia (Momogunsia).
Buuk kikinapa 205 upa nopo diho nouhudan do 20 suniba.
Buuk pinosohimbou do Kosa Kata Kita (KKK) Jakarta, Indonesia nopo diho nga sinuat id boos Malazu ih monusuzan kokomoi do kopooposizon tuhun tokou.
Suniba Pugai Balabak ih nadadi do tuhu tinimungan suniba diho nopo nga sinuat di Witer Gunik, kokomoi do iso kinaantakan kuminaa do songuhun haahangai (sumandak) doiho id Ranau.
DR JEFFREY Kitingan (kotohu gibang) minonoimo do buuk id Kaamatan Tenom.
Haahangai dino noikot sinumbung gisom do minaanasangi do kusai di kiginavo dosido.
Mantad diho pinugai oh haahangai dino gisom do nouhau. Pugai do nopomogai nopo nga pugai di bobos tavakas pinunganan do pugai balabak.
Pugai nopo diho nga naanu mantad iso kokompungan id Banggi ih novit haid mantad id pomogunan Polipin.
Mikunomo nogi vagu do kivaa kokompungan Balabak id Banggi ih notombuhui nogi tinimungan monunuat Momogunsia.
Nohingos oh inuhau do haahangai dii songian nousapan doiho id Banggi. Ingkuo po nga au nodi nokoguhi oh vinanus di hahangai dii.
Suniba diho minanaak poombitanan kogiiginovoo do au otuhid ih mangamban do komogoton koposizon.
JEMMY Markus songuhun mantad 20 monunuat id padagangan buuk ontok Kaamatan doid Hongkod Koisaan.
Buuk diho mogovit pason montok popotuhid do kalaalahanon pomuandaman momoguso do komogoton koposizon suvai ko popoikot nogi pason kumaa polinta montok mogovit komoomogoton pogiigizon do tuhun id sodu do kakadazan miaga do tinau Dusun Bonggi doiho id Banggi.
Oinsanan suniba id suang buuk diho nopo nga kapaampai do Puteri Salji ih sinuat di Welin Ebal, Tuah Unduk Ngadau (Flora Majamin), Tapau Tanah Bergumpal Cacing (Jafrin Julius Kaingud), Pinisiku Bukan Untukmu (Kathirina Tati), Pugai Balabak (Witer Gunik), Resort Podtungongisan (Raymond Majumah), Asalit (Monsu Godon), Sesal Dahulu Pendapatan (K. Anthonia Gilung), Pagung Lumbidan (Jalumie Mujit @ Omeh Miranda), Yanak-Anak (Ramlee Jalimin Jainin @ Tinta Dewata).
Kamar Pilu Herman (Jemmy Markus), Sayau (Angela Engkuan), Mayangan (Juilis Mokujal), Samad (Rita Robert Rawantas), Taman Kayangan (Soson Jan A. Khan @ Sutera Kalbu), Pilihan Pertama (Sofie Clara), Berkembang Daripada Debu (Yatim Ahmad), Lambaian Seratus Hari (Caroline Baginda), Cinta Dua Benua (Rozeline Vitalis), Dedalu (Martinah Obod).
Kiginumu do 500 buuk diho ih tinoodo doiho id Jakarta di kopupuson vuhan kaapat nakatahib naavi no do nakadagang.
Ogumu po daa di mongimuot momohi do buuk kigatang do RM25 diho nga au nodi nokouha. Hongkod pambasaan buuk Sabah po nga au po naatadan do buuk diho, ingkaa nogi do hongkod ponginabasan takavas miaga do UMS, UPSI, IPG Kent, IPG Keningau om suusuvai po.
Buuk diho pinadagang id piipio kinoizonon poompus pinanaandakan Kaamatan di vuhan kohimo nakatahib.
Nokotimpuun oh kinopointutunan do buuk diho ontok kinopotimpuunan Kaamatan nazatan pogun Sabah doiho id Tenom.
Ontok tadau diho nokotoimo ih Datuk Dr Jeffrey Kitingan do iso buuk.
Suminusuut di ontok Kaamatan DBKK, noukab oh hivang padagangan do buuk diho om nokotoimo ih Mayor DBKK Datuk Yeo Boon Hai do iso buuk.
Suvai ko kinapadagangan doid hivang Kaamatan, nakatazad nogi oh kapadagangan buuk diho minaza do 20 monunuat nakaampai. Komozon nopo diho nga nakadagang oh buuk diho id kogumuan uvang doiti id pogun Sabah.
Amaamaa oh nakadagang om nokotikid do buuk diho ontok kohimundukon Kaamatan doiho id Hongkod Koisaan, Penampang.
BUUK montok di Huguan Siou Tan Sri Joseph Pairin Kitingan.
Ontok duvo tadau diho, noukab oh hivang padagangan buuk diho doid Hamin Bisaya.
Suvai ko nakadagang kumaa tuhun ginumuan, nokotikid nogi kumaa piipio buu’an tagazo pogun Sabah.
Buu’an ngavi do notikidan nopo nga kaampai no ih Vozoon Montili Datuk Seri Musa Hj Aman, Huguan Siou Tan Sri Joseph Pairin Kitingan, Datuk Jainab Ahmad Ayid, Datuk Lajim Hj Ukin om Rita Lasimbang.
Poguhu ih haid diho, notunuzan nogi do buuk diho ih Huguan Potunud DBP Malaysia om ih Potunud DBP Sabah, Zandi Asmiah Hj Ajmain. – Utusan Borneo (12-06-2016)
