Di HENRY BATING
KENINGAU: Soginumu soribu mogigiyon mantad 23 kampung kapaampai mukim Bingkor om Tuarid Taud nosungkitan do vaksin id Titimungon Tulun Ginumuan Bingkor poompus 24-25 Julai di nakatalib.
Agayo kounsikaan do mogigiyon ngawi dilo ih pikiikiro 90 piatus tinaru Dusun Gana, Kujau om Nabai montok kinatabaian do momuruan kinoiyonon ngawi minanaak sokodung koponungkitan do vaksin kumaa diolo.
“Kinorikatan do momuruan ngawi minanaak sunduan kumaa wookon mogigiyon montok au rumosi mokisungkit,” ka di songulun mogigiyon.
Nokorikot do ontok dilo nopo nga ih Panakadai Montiri Karaja Tagayo Datuk Robert Tawik tu isio po nogi kawagu oh Puru Lansanon Koundangan Pogun (ADUN) Bingkor.
Poingampai nogi potindapou ih Kumoduwo Potunud do Kounsol Koumoligan Pogun (MKN) Sabah Norali Awang Damit, KPP Operasi ACP Shahril Daud om ih Upisor Kolidasan Watas Keningau Dr Mohamad Norhaizam Ahmad @ Narawi.
Wookon do mogigiyon nonuan po laid do kointalangan om koinsasamadan montok manaak diolo kalansanan pogulu ih do minokisungkit.
Ontok dilo poingamung nogi ih Lectus Fung sabaagi do Upisor Piromutan Parlimen Keningau om ih Yazid Haji Mohd Hasnan Tawik Mansai sabaagi Kumoduwo Porosidin Koisaan Koubasanan om Kotundunan Tinaru Gana, Kujau om Nabai Sabah (KGNS).
