Di HENRY BATING
KUALA LUMPUR: Tulun ngawi Sabah id Semenanjung au tolikudan manaak sakadai takanon tikid tadau ontok timpu torumot poinguwung id walai mongiwad korolihan Covid-19.
Montok dilo pinopotunui ih Kumoduwo Boyoon Montiri Sabah Datuk Seri Dr Jeffrey Kitingan do sakadai maya do upis piromutan Parti STAR Sabah montok potikidon kumaa tulun ngawi Sabah id Semenanjung Malaysia.
“Agayo kounsikaan kumaa kotinanan dagang ih minanaak do sakadai takanon diti,” ka di Dr Jeffrey tu isio po nogi kawagu oh Porosidin do Parti STAR.
Kinopotunuian dilo nopo nga nakapanau minihondot do kinotindapahan di Dr Jeffrey do Pitimbungakan Parlimen tu isio po nogi kawagu oh Puru Parlimen Keningau.
Ontok dilo nakaramit ih Dr Jeffrey do sakadai nokomoi mantad Gas Malaysia Berhad ih pinotunui di Luguan Upisor Iksokutif (CEO) do kotinanan dagang dilo ih Mohd. Hashimi.
Noboros di Hashimi do sakadai dilo nopo nga iso ponoluod do kotinanan dagang nokomoi kumaa tulun ngawi id pogun diti ih kotoguang do kosusaan mogihum kaakanan timpu diti.
Poingampai nogi potindapou do ontok dilo ih Kumoduwo Montiri Ponombuluian, Kogingaan om Koubasanan Datuk Senator Guandee Kohoi tu isio po nogi kawagu oh Monunurat Tagayo do Parti STAR Sabah.
Nokorikot nogi minooi ramit do sakadai dilo ih Ponirikohon do Parti STAR Semenanjung Datuk Haji Iskandar Datuk Abdul Malik Jangkat tu isio no popotikid do toluod dilo kumaa tulun ngawi Sabah di kotoguang do timpu korumatan id Semenanjung.
