Di HENRY BATING
KOTA MARUDU: Talob Bandau toi ko tomu tikid minggu id watas diti nopo nga iso kokitanan kopirurubaan mogigiyon Kimaragang, Rungus, Tobilung, Tombonuo om Sama sumondot id kakadaian montok mongindapu id kopialanan do dadagangon.
Pinopointalang ih Ustazah Ony Latifah, songulun monunurat poingamung do Koisaan Monunurat Momogun Malaysia (Momogunsia) do ilo nopo talob nga iso ababayan tagayo montok mogigiyon ngawi id watas Bandau (baino Kota Marudu) di pogulu po.
“Baino nopungaranan oh talob diti sabaagi do tomu nga ingkaa po toi kakal kogumuan tulun hiti id Bandau mamarait do pitomuwan dilo id ngaran do talob,” ka di Ony.
Nokointalang di Ony ilo di ontok noponongkirumaan id Talob Bandau.
Ontok dino papadagang ih Ony do mogisusuai kakamot gulu-gulu, buuk sinuratan dau, CD lihis gulu-gulu dau id koubasanan Kimaragang, kolindor Kadazandusun om susuai po.
Poingampai nogi minongoi pogkorumoh di Ony ih duwo momuruan om monunurat Momogunsia, ih Raymond Majumah om Nurul Omar.
Ontok talob dino, sundung po do ogumu nodi tinaru nokoruhang dumagang miampai kakamot dagangon nga norukutan nodi nga kakal okito kointutunan do pitomuwan dilo ih pogulu noroitan do Talob Bandau.
