Di HENRY BATING
SOOK: Agayo kounsikaan do mogigiyon Kg Inandung om Kg Kalampun soira noinsanangan oh talun-alun diolo minaya toluod kousinan pinobuyu di Montiri Komulakan om Sipoot Datuk Ellron Alfred Angin.
Minoboros ih Molohingon Kampung do Kg Inandung KK Kakun Akong do gisom di tadau minggu, mamaso no misin pinaatod di Ellron sabaagi do Puru Lansanon Koundangan Pogun (ADUN) Sook momogirid do talun-alun diolo.
“Pointantu nodi do kosimban oh talun-alun dagai soira do alaid nodi do au noinsanangan,” ka di Kakun.
Talun-alun nopo dilo nga wawayaan do mogigiyon Kg Inandung om Kg Kalampun mogoongoi-ongoi id kampung om nogi wayaan do tangaanak mongoi sikul id SK Kalampun.
Agayo kalansanan di Kakun do orulan oh kobolingkangan mogigiyon om tangaanak sikul ngawi minsusui talun-alun soira do opongo kopio monginsonong oh talun-alun nokomoi.
Lobi kopongunsikou, ka di Kakun, talun-alun id duwo kampung dilo nopo nga kapanaak komogoton popoburu kopomutanaman om kopolobusan asil dagangon id kakadaian.
