Di HENRY BATING
TAMBUNAN: Miagal do kakadaian ngawi suwai id pogun diti, kakadaian Tambunan nga nakawaya nogi do ogumu kinoburuon.
Kinoburuon nakapanau id kakadaian Tambunan mantad pogulu gisom baino, atalang kopio do okito om iso nopo kokitanan do kinoburuon dilo nga gambar-gambar ngawi nanu mantad ponong sunsuion do bawang Tondulu.
POMPOD linominon kadai Tambunan id disan bawang Tondulu ontok toun 1970-an.
Soira do maganu gambar do kakadaian Tambunan mantad ponong sunsuion Tondulu, id otolikudan nopo nga Mosogit Watas om nogi Upis Watas id timpak nuluw.
Mantad kinomordikaan di ontok toun 1963 gisom baino, haro nogi oh duwo Lansanon Koundangan Pogun (Adun) montok Tambunan. Kumoiso nopo nga ih Datuk Anthony Gibon (tongotiagak) om kumoduwo nopo nga ih Huguan Siou Tan Sri Datuk Joseph Pairin Kitingan.
Montok popokito do kinoiyonon Tambunan mantad pogulu, agayo kounsikahan dagai montok minogolos do gambar di Gundohing Henry Amaris id sunsuion tayid bawang Tondulu ontok toun 1950.
KOKITANAN do kakadaian Tambunan mantad tawan ontok toun 2004. Gambar diti nanu mantad ponong sahau do sunsuion bawang Tondulu.
Gambar susuai nopo nga nanu di Gundohing Henry Bating ontok poingkaraja po laid sabaagi do Monunurat Abar kumaa di Huguan Siou Tan Sri Pairin.
Kumaa tobpinai ngawi, intangai no iti gambar-gambar karait do kakadaian Tambunan montok pongitanan, kalangadan om kointalangan. – (Utusan Borneo 22/8/2010)
