Vinakas SM Sains Labuan sumigampot timpak Nabalu minanaak kounsikaan

Vinakas SM Sains Labuan tumakad Nabalu minogovit kounsikaan.

Di HENRY BATING

LABUAN: Sundung kotoguvang do mogisuusuvai kootulan id timpu pandemik diti nga tomoimo do nokosigampot doid himunduk Nabalu oh tinimungan SM Sains doiti ih nakapaampai 20 tuhun di kavavagu.

Minoboos ih huguan tinimungan, Rohana Yasin do kinatakadan dioho diho nopo nga au ih ouhan nga mantad no do tinoboi om vinakas ginavo do nokohimunduk oh tinimungan dioho doid timpak Nabalu miampai tavaavasi.

Naangazan dagai tuminakad gisom doid timpak Nabalu nopo nga nadadi do iso kaandaman toomis om kahaahangad kozo,” ka dau.

Tinimungan pinunganan do ‘Geng Hiking Excel (GHE)’ diho nopo nga noomungan do mongingia, suupu sikul om nogi piipio mohoing susumikul.

Nosusui di Rohana do abaabazan tuminakad Nabalu nopo diho nga montok popiinsomok do pionitan om pisokodungan kalaja id piahatan do mongingia, suupu om nogi mohoing susumikul ngavi.

Tumanud di Rohana, sombuhan poguhu ih do noikot oh tadau tumakad Nabalu diho, minisingubas po haid izioho tumakad do piipio nuhu doiti om soosomok Labuan.

Agazo koozo kounsikaan di Rohana do nododizan do tinimungan diho minongoi takad Nabalu tu di toun 2019 haid po izioho minamalan do kaangazan diho nga nopiamban-ambanan diti kaantakan pandemik baino.

Kokomoi kinatakadan Nabalu, noboos di Rohana do minonimpuun izioho do haang tumakad mantad Timpohon di ontok doungosuvab om nokoikot doid Panalaban di jam 4.00 minsosodop.

Di koikot izikoi doid Panalaban, minoginodop po haid izikoi doid hostel doiho nga di pikiikio jam 2.00 minsusuvab, minonimpuun di vagu izikoi do haang tumakad om nokoikot doid timpak Nabalu di pikiikio jaam 6.00 doungosuvab,” ka dau.

Tumanud di Rohana, vookon haang notoguvang dioho ontok tuminakad nopo nga poingkuo popotimpoon do vinakas stamina songian do mingkuukudi oh oksigen ontok koikot doid gontob takavas do nuhu.

Suvai mantad diho, ka di Rohana, kovoovozoon do tavan madaat nga nadadi nogi do kaantaban tu kaantakan umasam kopogovit do ahamou lahan vazaan om ouhan do ahandai.

Sundung do ingkaa, oinsanan kaantaban diho naangazan dagai monguhan maza do pisokodungan id piahatan do tambahut ngavi doid tinimungan om nogi tutumakad ngavi do suvai,” ka dau.

scroll to top