KOTA KINABALU: Bii’on kozo do Polinta Pogun Sabah montok manaak kasagaan do apalai tana panaadaan do pangkalan kavavagu do Pulis Marin om Pasukan Gerakan Am (PGA) doid Nabawan.
Minoboos ih Vozoon Montili Datuk Seri Hajiji Haji Noor do bii’on koozo haang diho sabaagi do iso haang manamong koumohigan pogun doid tinda om nogi mangantob kosuangan modikot aiso kasagaan humapus pivohitan pogun.
“Sundung do otoonong om atamangan oh koumohigan pogun Sabah do baabaino diti nga tomoimo tokou popotounda kagaaganapan do susumangod ngavi manamong do pogun,” ka dau.
Noboos di Hajiji iho di ontok minongoi isido tombuhui kapantangan kuminaa di Huguan Pulis Sabah Datuk Idris Abdullah doid Hongkod Pulis Kontinjen Sabah doiho id Kepayan di kavavagu.
Ontok kinotombuhuzan diho, nokointahang di Idris do ogompi koozo koumohigan do pogun Sabah id siibo do Polis Diraja Malaysia (PDRM).
Ontok pinituubungan diho, minokianu nogi Hajiji kumaa PDRM montok poposodia do kalatas kalaja montok popotonduhi vagu do pogoduan kopomogunaan pam bot doiti id Sabah.
“Maza do kalatas kalaja diho, oviton tokou kumaa doid miting koumohigan pogun toun diti montok pibaasan maganu do haang,” ka dosido.
Pinokianu nogi di Hajiji oh PDRM montok mongintong koozo do luputan kokomoi do nadadi iti pogun Sabah sabaagi pogumbazaan papatazad do dadah.
Montok diho, pinopobuzu ih Hajiji do kounsikaan dau kumaa PDRM montok toinsanan pinggisaman dioho manamong koumohigan pogun om nogi popoimbuhai do kataanangan pogiigizon id piahatan do tuhun ngavi.
