Pomurimanan tanak nosusu id kakadaian karait do koposion id kampung

BAWANG Moyog id Penampang, ogumu tulun rumikot nga kakal oniting om ananatau.

Di HENRY BATING

Kotob 1

ID iso pinogirumaan miampai tangaanak sikul, kiwaa iso pinomurimanan susumikul di awasi kopio do suguton kawagu monusui.

Susuian tanak sikul nopo dii nga miagal orulud sumusuut diti.

Poingiyon oku id kawalaian Kingfisher Likas miampai tina, tapa om koobpinaian ku.

Poinsikul oku id sikul kabansaan kawo Sina ih au osodu mantad walaiku.

Ounsikou opurimanan ku miampai molohing om koobponaian ku id lamin.

Ounsikou oku nogi do id sikulan miampai tambalut ngawi. Tikid tadau mongoi oku sikul om muli walai sumakai do bas.

Tikid kosuabon mongoi sikul om muli ontok pitangadau, katalib ikoi do bawang Likas om tisan daat Likas.

Bawang Likas do okito ku nga olumis nogi. Waig lumuyung di oloyo om somoonu okito ku oh tulun magapon id disan bawang.

Somoonu nogi do okito ku oh tulun poinsakai padau do momukot sada mantad bawang Likas sumobut do tisan daat Likas.

Iyoku nopo nga nosusu id walai pongubatan Queen Elizabeth om nakagayo id kakadaian Kota Kinabalu.

Sundung do ingkaa, ontok timpu koundarangan muli oku kampung miampai tina, tapa om koobpinaian.

Muli ikoi id kampung mongoi soromo do taki om todu ih poingiyon id iso kampung ponong hilo id Keningau.

Soira muli id kampung, asaasaru ikoi maya talun-alun Penampang – Tambunan.

BAWANG Likas id Kota Kinabalu ogingo om ogumu tulun rumikot nga orulan do oyomutan.

Id pamanahan sumulok do Penampang dumontol do takadon id Moyog, okito ku oh bawang Moyog lumuyung miampai do alanahas.

Bawang Moyog dii nopo nga agayo nogi miagal-agal do bawang Likas. Nga bawang Moyog lobi do oniting om ananatau miagal sorikitonon ku oh sada do sangkaau-kaau.

Ogumu nogi tulun okito ku do sampanau-panau nga aiso okito ku do tulun magapon om momukot do sada. – oputan id kotob2

scroll to top