Tambunan Nakaanu Ngaran Mantad Duwo Susumangod

LUGUAN TOSIOU ... Winakas di Gombunan om Tamadon pinopoimbulai do kataranangan om komogoton do mogigiyon id Tambunan.

Pangaan I

Di HENRY BATING

NGARAN do Tambunan nopo nga nokoimbulai mantad karayahan duwo susumangod tosiou pogulu ih Gombunan om Tamadon. Pinioput oh ngaran duwo susumangod diti. ‘Tam-‘ nopo nga mantad ngaran di Tamadon om ‘-bunan’ nopo nga mantad ngaran di Gombunan.

Montok kasarahan do duwo susumangod dilo, pinoingkakat oh duwo tiningulun id kakadaian Tambunan. Tiningulun dilo pinungaranan do Tugu Tambunan. Tugu dilo winonsoi di Gundohing Stanislaus Kasun, songulun tabaal momolukis mantad Tambunan.

Baino diti, kakadaian Tambunan nopo nga pikiikiro do 75 kilometer mantad Kota Kinabalu. Orikot oh kakadaian Tambunan sumakai do korita pikiikiro do 90 minit mantad longkod pogun Sabah, Kota Kinabalu.

SAKAG TAMBUNAN … Stanislaus Kasun (minomonsoi tiningulun Tambunan) maso tumabi di Huguan Siou Tan Sri Joseph Pairin Kitingan ontok kinopoimaganan do tiningulun Tambunan di toun 2006.

Tumanud susuian, ontok pogulu, Tambunan nopo nga talun toomod, aiso po tulun mogigiyon. Kotolunan id Tambunan noponu do suang talun kaampai no limbata om tambadau. Notimpuunan oh Tambunan niyonon do tulun soira nokorikot oh minogundaliu mantad Nunuk Ragang.

Tinimungan mogigiyon timpuun do nokorikot nopo nga linuguan di Gombunan. Ih Gombunan nopo nga songulun mantad piipiro luguan susumangod mantad Nunuk Ragang. Suai ko osiou, ih Gombunan nga osonong nogi. Ontok diri, aiso po ngaran do kinoiyonon dilo.

KAMPUNG SONDOT … kokitanan do kakadaian Tambunan ontok timpu Boritish.

Minomutanom oh tinimungan di Gombunan tu alabak kopio katanaan hilo. Ogumu tanom-tanom diolo miagal do parai tidong, luong, mundok, tawadak om guol. Kokusaian nopo nga tumingan mongintalun do bosing, bakas om nogi tambang. Ogumu nogi kawagu oh kouwaan id talun di obuli do akanon. Mantad diri, ounsikou kopio koposion do mogigiyon ngawi.

Piipiro linaid diolo poingiyon hilo, ogumu nodi tulun om agayo nogi katanaan do noukaban diolo. Nosiliu nogi do koubasanan diolo moboros do yoolo nopo nga mantad sondot (dataran). Nga au alaid oh kounsikaan diolo tu nokorikot oh iso tinimungan mogigiyon di sumolon/ mosolon. Tinimungan taraat diri nopo nga rinoitan do tulun ‘Tosundung’. Tinimungan diti nokorikot mantad konuluhan ponong kosilahon.

KARANAHAN … momutanom do parai nosiliu do pogihuman koposion tulun Tambunan ontok pogulu.

Minokiintingonon yoolo miampai minomorilik do tanom-tanom, minogowit do kotos om minamatai do tulun id kampung sondot dilo. Naangaian do tulun di Gombunan monguyung oh tinimungan tulun taraat diri miampai nooruwan do nosuhatan minogidu.

Lobi po di kinotogodo tulun Tosundung diri tu noikuman do au nokotori. Ruminikot kawagu yoolo miampai pikiikiro do 30 susumangod montok minongoi panangod di Gombunan ih ontok diri maso morobuat id dumoh diolo.

Pinatai diolo ih Gombunan. Rinalag diolo tinan di Gombunan miampai pinutul oh tulu montok nowit muli, pokitanan do kounsikaan kumaa tulun ngawi Tosundung. Pinataid oh tulu di Gombunan di torigi di akawas montok insasanaan do tulun ngawi Tosundung.

Montok kinaantakan dilo, osusa kopio ginawo do tulun ngawi id sondot tu nokorundun nodi ih Gombunan, susumangod kobilangan diolo. Montok kasarahan, pinungaranan diolo kinoiyonon id sondot do Gombunan. Ontok diri, suminumpa nogi yoolo montok momulokop do kinapataion di Gombunan.

NOKOMOGOT … kokitanan somboogian kakadaian Tambunan ontok timpu bainoa.

Ontok timpu kosusaan dino, nokorikot oh iso tinimungan tulun mantad ponong kotonobon. Tinimungan dilo nopo nga roitan do tulun Tamadon. Tulun ngawi do Tamadon nopo nga osonong om osuau kumaa tulun Gombunan. Posodia nogi yoolo manaak kouhupan montok momulokop kumaa tulun Tosundung. Opurimanan diolo, do insan tadau nga rumikot nogi kawagu oh tulun Tosundung montok mongindaraat do tulun Tamadon.

Miampai do au nopisarau-sarahan, nokorikot monigog oh tulun Tosundung montok mongoi pagawi do tulun Gombunan. Nga ontok diri nokoinggumu no tulun Gombunan tu natambaan do tulun Tamadon. Minisangod yoolo miampai do ogumu susumangod tulun Tosundung do napatai. Iri po noolu nga minogidu id talun. Mantad kounsikaan dilo, notimpuunan oh pogigiyon di otoronong miampai tulun Gombunan om tulun Tamadon nosompuru mogigiyon id sondot. – Utusan Borneo 19 Feb 2011.

scroll to top